Eftir Jón Hafstein Sigurmundsson

Þorlákshöfn | "Mig hefur dreymt um að leika síðan ég var í leiklist í skóla," sagði Ásta Margrét Grétarsdóttir, ein þeirra sem var hvatamaður að annarri endurvakningu Leikfélags Þorlákshafnar. Félagið heitir raunar Leikfélag Ölfuss að þessu sinni.

Ásta sagði að það hefði verið draumur sinn eins og margra annarra barna að verða stjarna á sviðinu og standa frammi fyrir hópi aðdáanda. "Ég sá tækifærið opnast þegar Ráðhús Ölfuss var tekið í notkun með stóru og glæsilegu sviði. Ég get örugglega ekkert leikið en það skiptir ekki öllu máli heldur hitt að hafa gaman af þessu og vera innan um skemmtilegt fólk. Svo er þetta örugglega þroskandi."

Ásta sagði að hún, Árný Leifsdóttir og Róbert Dan Bergmundsson hefðu komið saman í haust og rætt við menningarfulltrúa Ölfuss sem tók þeim mjög vel, hvatti þau og studdi við að koma félaginu á koppinn. Meira að segja hefðu þau fengið 300 þúsund kr. styrk úr menningarsjóði. "Boltinn var fljótur að bæta utan á sig og áður en við vissum af voru komnir upp undir þrjátíu félagar, frá átta ára til sextugs, og starfsemin á fullu. Það eru ekki allir að leika, það þarf svo margt annað að gera, sauma búninga og leiktjöld, sjá um ljósin og svo erum við komin með hljómsveit því nú stendur til að frumsýna 9. mars. Við erum að æfa söngleik um hippatímabilið sem er heimasmíðaður af leikstjóranum okkar, Svani Gísla Þorkelssyni, og leikurunum sjálfum," sagði Ásta Margrét".

Formaður leikfélags Ölfuss er Jóhanna Sigríður Emilsdóttir.

Þriðjudaginn 28. mars, 2006 - Leiklist

LEIKLIST - Leikfélag Ölfuss

Leikur að vonum í Þorlákshöfn

Ég elska alla Söngleikur

Höfundur handrits og leikstjóri: Svanur Gísli Þorkelsson. Tónlistarstjóri: Róbert Dan Bergmundsson. Sýning í Ráðhúsi Ölfuss kl. 16.00 19. mars 2006.

SÖNGLEIKURINN Ég elska alla er fyrsta verkefni hins nýja leikfélags Ölfusbúa sem stofnað var á gömlum grunni Leikfélags Þorlákshafnar. Að fyrstu uppsetningunni koma um það bil þrjátíu manns á aldrinum 7-60 ára svo það má gera ráð fyrir að þræðirnir komi víða að úr sveitarfélaginu. Friður á jörðu, blóm og ást eru viðfangsefnið; vinsæl hippatónlist sem er tengd saman með skondnum persónum og textabrotum án eiginlegs söguþráðar og úr verður prýðilegasta skemmtun.

Hljómsveitin Síðasti séns var á sviðinu og lék smelli hippatímabilsins, ýmist undir söng eða án söngs. Hljómsveitin var hluti af sviðssetningunni þegar persónurnar voru staðsettar á balli og þess vegna úr stíl að hljóðfæraleikararnir skyldu ekki vera í búningum tímabilsins. Hvað sem því líður var tónlistin og söngurinn fagmannlega flutt, sérstaklega miðað við reynsluleysi söngvaranna. Sömu sögu er að segja um leikinn; næstum allir voru að leika í fyrsta sinn og fær leikstjórinn hrós fyrir hópatriðin ásamt því að smíða svo stórt verkefni en hann er áhugamaður í leikstjórn með nokkurn skáldferil. Sýningin bar dálítil merki hægagangs á köflum en um einhverja sunnudagsþreytu var að ræða. Mörg ung börn horfðu á sýninguna en því miður trufluðu þau áhorfendur og væntanlega leikendur líka. Nokkrar persónur skáru sig úr. Fyrsta skal telja hippamömmuna sem Þrúður Sigurðar lék sífulla og kærulausa. Einnig var Ásta Margrét Grétarsdóttir góð í hlutverki Dúu gömlu, hún kunni að ná athygli áhorfenda með kómískum töktum. Daníel Haukur Arnarsson var einnig efnilegur í hlutverki Jóa töff.

Sviðið var ekki eiginlegt leiksvið, mjög grunnt og breitt. Sýningin er unnin af litlum efnum og góðar, einfaldar lausnir þess vegna notaðar eins og marglit tjöld í bakgrunninum. Stundum var komið inn með sófa, stóla og borð til þess að sýna mismunandi heimili en það hefði nægt að nota púða og teppi eða litla kolla sem hluta fyrir heild þar sem leikmyndin var ekki natúralísk að öðru leyti. Búningarnir voru kapítuli út af fyrir sig og merkilegt hvað hægt er að safna saman miklu frá hinu litríka blómatímabili í tískunni.

Söngleikurinn Ég elska alla er fjörugur, lagavalið gott og tónlistin vel flutt. Þeir áhorfendur sem hlustuðu á tónlist tímabilsins í blómabuxum og mussum á sínum tíma eiga að geta skemmt sér vel og væntanlega hinir líka.

Hrund Ólafsdóttir